English - Italiano - Español - Nederlands - Papiamentu - Français - 'العربية
About me
Na vários okashon, ku mi purba presentá Johannes su talentonan artístiko, loke ta resaltá ta e kapasidat di desaroyá den su búskeda apstrakto un resultado fuertemente influenshá pa e "palèt karibeño i antiano". Mi ta konvensí, sin embargo, ku e afirmashon ei ta masha limitante: efektivamente, buskando den henter e region, lo por desifrá nan fásilmente, i ta pesei e dedukshonnan final ta hopi mas kompleho. Promé ku nada, ta esensial indiká e echo ku Johannes ta un berdadero artista auto-didakta ku a haña su "vokashon públiko" mas lat den bida.
Kontrali na mayoria di artista di ken nan konseptonan tin nan orígen den similaridat ku obra artístiko di pasado i akadémikonan di aktualidat, su búskeda konseptual ta bon desaroyá i e ta originá den su propio eksperensianan di bida. For di un edat hóben Johannes a pasa pa eksperensia difísil, kompleho i intenso, debí na relashon di famia ku a tèst e límitenan di violensia, loke semper a laga marka i sikatris (ku te awe ta afekt’é). Tur esakinan a meskla ku un sensibilidat innato, orientá riba konflikto mundial moderno na gran eskala. Komo a oblig’é traha for di un edat hóben el a desplegá hopi sorto di aktividat laboral; di waiter i asistènt den hòspital, te bendedó di korant i piloto komersial. Su biahenan rònt mundu a dun’é oportunidat di inkorporá komponente internashonal den su vishon i konosementu.
Tur esaki semper ta positivamente influenshá pa un plaser insesante di krea skèch figurativo i realístiko, usando pòtlot komo un ekspreshon di su habilidat innato i su kapasidat kreativo, ku ta motiv’é pa delineá portrèt, figura i ‘naturalesa morto’ koutivante. Ta importante i hustu enfatisá ku Johannes ta un artista ku por pinta masha bon i ku sa, na tur momento ku mediante un ekspreshon gráfiko fuerte, e por representá realístikamente loke e ta mira. Su promé eksperensia ku fèrf di zeta di koló i kuashi pintando paisahe òf tema apstrakto ta un trayektoria legendario rápido, inkreiblemente interesante i sugestivo.
Mi ta kasi konvensí ku, pa Johannes mes, ta un proksimidat kasi inkonsiente, pero pa por komprendé i, konsekuentemente identifiká parameter rekonosibel, lo mi gusta pon’é paralèl ku e periodo di "pointillismo". Impresionismo konektá ku paisahe i medioambiente representativo, poniendo koló puru riba kánvas markando forma spesifiko i no halá di kuashi, Esakinan ta obra ku ta demostrá su empeño di ke lubidá su mes pasado. Den su búskeda, ta nase e soño di su futuro i e eksploshon positivo di e plaser di deskubrí su propio kapasidat natural di por usa e téknika piktóriko. Ta un konvergensia yen di luminosidat kaminda apresiashon di renovashon di e matisnan ta keda imprimí riba retina di e opservador. Una bes e pintor sedusí e opservador – i aki Johannes ta kuminsá koba den un téknika ku ta progresá den un búskeda mas evolushoná, identifikabel – e ta purba semper komprendé nos denter di un “pointillismo”, kaminda e puntonan tradishonal ta transformá den filamento konvulsivo ku ta drenta otro, pa despues nan bira “skèch entrelasá”. Awor esaki ta otro momento ku ta definí, si e pointillismo ta konektá ku su movimentu di positivismo, anto e ora ei e fórmula pointillista ta bira un forma di antítesis. Johannes no ta kopia mas loke e ta mira, su arte ta kambia bira un funshon intelektual ku tin forma i koló realístiko; di e manera akí e ta renunsiá e speransa di haña su trabou ya kreá kaba den e mundu eksterno i, asina, e ta pinta su arte berdadero, leu for di e falsedat di realidat. Re-evaluashon di e filosofia di Shopenhauer, ku ta bisa ku mester konsiderá e fenómeno mundial superfisial ta bira kla, miéntras e kontemplashon artístiko solitario ta obligá nos konfrontá e kontakto ku berdat. Ta interpretá e momento ku Johannes ta haña refugio den su introvershon artístiko/natural den su diferente kolekshonnan komo idiosinkrasia i berdat variá, kaminda ta asentuá e nifikashonnan simbóliko i ekspresivo ku ta bai den e direkshon di dilema sosial i trágiko. Na e punto akí e ta sigui asimilá atributo sientífiko ku, na lugá di re-dirigí na e sanamentu di e situashon tristu di e masanan, e ta transformá su medio den un meditashon i komprenshon di eksplotashon i destrukshon (e ehèmpelnan mas notabel ta e serienan "Yunan di Guera", "Nos ta hopi" i Muhé òf opheto". Den su inmenso mundu interno ta aparesé un hubentut kompliká, ku tur e speransa i deseonan inalkansabel ekspresá den "Mi Mundu Blou".
Su soñonan ta permanesé unifiká ku reverensia pa loke ta e provokashon di su propio kresementu, den un direkshon kasi imperativo di agotá su emoshonnan, su rabia i su sufrimentu. (“E mònsternan di Quihote”.) Durante e mesun periodo akí di hopi tenshon i ansiedat interno, su kolónan ta kuminsá bira mas suave i loke tabata identifiká superfisialmente komo karibeño òf antiano, ta kambia, ku homogeneidat i dominansia di tono di gris i kontraste entre pretu ku blanku (e koló ta sirbi únikamente pa asentuá loke ta neutral), definiendo un éksito mas den e biahe piktóriko di Johannes. Tin un aproksimashon delikado na un estilo simbóliko realístiko, e “krus” pointillista ta bira mas largu anto e ta pèrdè su esensia orgániko, ripititivo i kontinuo. Awor e ta bai mas serka di loke ta figurativo i ta manifestá di manera violento, ku gran spesifisidat pa deliniá e paisahe desolá di New York City den e serie “Metrópolis”. Aki e ordenansa ku ta goberná espasio tangible, ta kontorshoná konvulsivamente, sobrepasando e límitenan mes di e lienso blanku; nan ta parti di dje, anto nan ta bira eskultura plat, propagando direkshon di loke ta aksesibel. Pida palu ta bira arte anto den e frenesí akí, ku velosidat den ehekushon di e obra, arte di Johannes ta transformá kompletamente, stimulando no únikamente kontemplashon di e imágen mes, sino tambe su sonido i fragansia partikular.
Ku tur siguridat, e intensidat konseptual, e ekspreshon krudo i violento, ku e estilo artístiko di “Ousider-Art”, ta obligá nos drenta vigorosamente i ku outentisidat apsoluto un era nobo, ku pa hopi hende ainda ta deskonosí. Sin embargo a toka mi e gran suerte di konos’é. Ta un serie di gran obra, hopi meter largu di tela firkant, kaminda tur kos ta bira kompleho fo’i ora ku ta span e tela den e leshinan úniko. Esaki ta fòrsa e artisa pinta abou na suela di su studio. E obranan akí ta presentá un fondo monokromátiko riba kua e formanan ta drenta otro libremente. Nan ta meskla i interkalá pa duna bida na figura i forma geométriko skondí. Nan ta move den un ambiente imaginario ku violensia ekspresivo i estilo krudo, representando intimidat, miedu i inkonsiensia indefiní i fantástiko.
Mi ta kere ku na momento di e proyekshon mas haltu di nos propio pensamentu i ser interno – aki invidualidat di un artista no-konvenshonal ta prevalesé – e ta riska su eksistensia personal kaminda e por dirigí su emoshonnan partikular, su energía vital i ideanan original ku ya el a libra di un kuadro konvenshonal.
Awor Johannes su obra ta manifestá komo un área di kontemplashon, den kua e ta kapta aktivamente, kaminda fantasia ta reina altamente, via kua fásilmente por mira den su liñanan atributonan simbóliko i edukativo, supérfluo pa loke ta realidat… e enkanto ta portretá komo ireal i e noshon irealístiko akí ku kontinuamente ta envolví arte, ta un refleho di e artista mes.
Irene & Luciano Rossi